«Гад гьарай я!» - гьахълудаказ лагьанва халкьдин мисалда. И кар Курхуьруьн арендаторри, лежбервилинни фермервилин гъвечIи майишатрини дериндай аннамишнава. ГьакI хьайила, магьсулдарвилел машгъул тир С. Шайдаев, Т. Сийибулаев, А. Жаватов, М. Султанов, Н. Саругъланов, В. Саругъланов, А. Шихжамалов ва масабур гад вахтунда агудунин къайгъуйрик ква.
Сифтегьанбурукай яз, вич фадлай магьсулдарвилел машгъул тир С. Шайдаева вичин кIвачихъ галай 27 гектар къуьлуьн, 7 гектар мухан никIерай техилар са куьруь вахтунда кIватIна куьтягьнава. Санлай кьурла 36 тонндилай виниз техил кIватIнава.
И карда КIварчагъай атанвай комбайнер Несрудинов Алимердана, адан куьмекчи Урдиханов Бубахана екез куьмекна. Комбайнидилай къуьл хутахиз хьайи Пагьливанов Тарланани дурумлудаказ зегьмет чIугуна. Исятда комбайниди янавай никIерай самарикай туькар кьаз, абур алафдин суракьда авайбуруз маса гузва. Гьелелигда 2000 далай виниз туькар Агъул патаз маса ганва. Прессподборщик гвай Г. Гьажиева, рабочияр тир Аким ва Нарик Саругълановри, Гьуьсейханов Анвара чимивилизни килиг тавуна хъсандиз кIвалахзава.
Къизилдин ранг янавай, лепе гуз акъвазнавай техилар акурла рикIик шадвал акатзава. Чпин никIерай техилар арендаторар тир М. Султанова 10, А. Жаватовани 4 гектардай кIватIна куьтягьнава.
Исятда Алимерданавни Бубаханов гвай комбайн Т. Сийибулаеван участокдиз фенва, къуьлер язава.
Вилик Нариманан 40 ва Тагьирмирзедин 80 гектардай техилар кIватIунин везифа акъвазнава.
ИкI, Курхуьруьн сергьятда, авай чимивилеризни килиг тавуна гад агудунин еришар къвердавай йигин жезва.