Къадимлу лезги халкьдихъ адан аслу туширвал хуьн патал кьиле фейи женгера игитвилин халис чешнеяр хьайи кьегьалар, къуватлу пагьливанар вири девирра хьайиди я. Абурун кар къе спортдин майданрал чпин гьунарар къалурзавай, лезги халкьдин, лезги чилин ад хкажзавай спортсменри давамзава. ГьикI лугьудач кьван машгьур боксер, агъастIалви Альберт Селимов Шарвилидин неве я лагьана?!
РикIел хкиз кIанзава: Россиядин лайихлу тренер Нурипаша Талибован гъилик боксдал машгъул жезвай Альберт Селимов 3 сеферда Россиядин, кьве сеферда Европадин, дуьньядин (2007-йис) чемпион, Пекинда кьиле фейи Олимпиададин къугъунрин иштиракчи, чи ва къецепатан уьлквейра тухвай гзаф кьадар турниррин гъалибчи, дуьньядин Кубокдин иеси я.
И йикъара А.Селимова «Россия - спортдин держава» лишандик кваз Москвада «Мегас- порт» спортдин Дворецда кьиле фейи Европадин чемпионатда иштиракна. Россиядин хкянавай командадин составда аваз 60 килограммдин заланвиляй рингдиз экъечIай ада къуватлу са шумуд боксёрдин, гьа гьисабдай яз Редуан Каян (Швеция), полуфиналда Эрик Донованан (Ирландия) ва финалдани Томас Сталкеран (Англия) винел гъалибвал къачуналди, 1-чка кьуна ва Европадин чемпионвилин тIвар къачуна.
СтIал Сулейманан райондин агьалийри кьегьал хва Альберт Селимоваз чIехи агалкьун мубаракзава.