Аялар чи гележег я – им садазни сир туш. Гьавиляй гьукуматди акьалтзавай несилдин гьакъиндай кьетIен къайгъударвални ийизва. Лагьана кIанда хьи, и кардик Кьасумхуьрел алай ЦСПСД-дин государстводин карханадини (ГУ-ди) вичин пайни кутазва. Гьафтеда 5 юкъуз чи центрда педагогри, психологри, медработникри, социальный хилен пешекарри тIимил таъмин, диде-буба кьилел аламачир хзанрай тир, гьакIни набут аялрихъ галаз кIвалах тухузва.
Центрада тренажерный зал кардик ква. Ана пешекаррин гуьзчивилик кваз физический рекьяй зайиф аялри чпин сагъламвал мягькемарзава.
Гьар са аялдин игьтияжар ва сагъламвал фикирда кьуна, центрада аялриз тIуьнар гузва.
Идахъ галаз санал, центрадин пешекарри аялрин чирвилерин дережа, зигьин, кьатIунар артухардай серенжемарни кьиле тухузва. Кьилди къачуртIа, аялар тIебиатдин гуьзел ва тарихдин метлеб авай чкайриз экскурсийриз тухузва, абурухъ галаз гьар жуьредин мярекатар тешкилзава.
Центрада «Сагъламвилин югъ», «Дидейрин югъ», «ПIапIрус чIугуниз акси югъ», «Кесибвал арадай акъуддай международный югъ», «Чирвилерин югъ», «Аялар хуьдай международный югъ», «Хзандин югъ» ва лишанлу маса йикъар къейдзава. Анра гзаф аялри активвилелди иштиракзава, чпихъ яратмишунрин ва маса рекьерай алакьунар авайди къалурзава.