Вири уьлкведа хьиз, СтIал Сулейманан тIварунихъ галай райондани 1941-1945-йисарин Ватандин ЧIехи дяведа Советрин халкьди Германиядин фашизмдин винел Гъалибвал къазанмишайдалай инихъ 65 йис тамам хьунин сувар шад гьалара къейдна. Кьилди къачуртIа, хуьрера, культурадин маканра, школайра дяведин ва далу патан фронтдин ветеранрихъ галаз гуьруьшмиш хьунар, вечерар, маса мярекатар кьиле фена. Гьа ихьтин са шумуд мярекатдикай чи редакциядиз ракъурнавай чпин чарара хуьрерин мухбирри хабар гузва.
- И йикъара райондин ЦБС-да Гъалибвилин 65 йисан юбилейдиз талукьарнавай шадвилин мярекат кьиле фена, - кхьизва хуьруьн мухбир Гь. Кьасумова. – Анал дяведин ветеран М. Юнусова вичин женгинин рекьикай, агъсакъалар тир В. Исмаилова ва Ш. Къаинбегова чпи дяведин йисара далу пата чIугур зегьметдикай, отставкада авай полковникар тир А. Гьажимурадова ва И. Расулова дяведин йисара чи халкьди, Яракьлу Къуватри къалурай кьегьалвилерикай, абурун дуствиликай метлеблу ихтилатар авуна.
Анал, хуш келимаяр лугьунихъ галаз санал, шаирар ва прозаикар тир С. Саидгьасанова, З. Жабраиловади, Ш. Абакаровади, А. Камилова, Ш. Шабатова чпин литературадин эсерар кIелна. Манияр лагьай, хуралай дяведин йисарин шиирар кIелай школьникар тир И. Исмаилова, Гь. Гьасанова, С. Бабаевади, Ж. Рамазановади, К. Къаинбеговади, А. Мурадхановади, Б. Нисредовади и межлис мадни гурлу авуна.
- Гъалибвилин 65 йисаз талукьарна Курхуьруьн М. Рагьимован тIварунихъ галай юкьван школада кьиле фейи мярекат, тебрикдин куьруь гаф рахуналди, анин директор Ш. Шихбабаева ачухна, - кхьизва РФ-дин журналистрин Союздин член Р. Набиева. – Гуьгъуьнлай анал тарихдин муаллим Т. Челябова дяведин йисара хуьряй фронтдиз фейибурун уьмуьрдин ва женгинин рекьерикай, далу пата зегьмет чIугурбурукай фактаралди девлетлу суьгьбет авуна.
Дяведин йисара далу пата зегьмет чIугур, гзаф йисара Бакуда парча храдай фабрикада жавабдар къуллугъар авур М. Алиеван, ДР-дин лайихлу муаллим А. Адилован рахунарни метлеблубур хьана.
Ихьтин мярекат хуьруьн 2-нумрадин юкьван школадани кьиле фена.
- Ватандин ЧIехи дяведа телеф хьайибуруз эцигнавай обелискдин патав Эминхуьре кьиле фейи мярекатдал хуьруьн поселенидин кьил Р. Рамазанова, школадин директор Р. Османова тарих патал лап зурба метлеб авай дяведин йисарикай гегьеншдиз суьгьбетна, Гъалибвал къачуник эминхуьруьнвийрини еке пай кутурди къейдна, - кхьизва А. Магьмудова. – Шадвилин мярекат хуьруьн Культурадин кIвалин ва школадин гьевескарри чIехи концерт гуналди куьтягь хьана.
Гъалибвилин суварин гьуьрметдай ЦIийи поселокдин юкьван школада са шумуд мярекат кьиле фена. Тербиядин рекьяй школадин директордин заместитель Н. Женетханова чаз кхьизвайвал, школьникар Ватандин ЧIехи дяведин иштиракчи Юнусов Маидин Мегьамедовичахъ галаз гуьруьшмиш хьана. Дяведин йисарикай, гьалтай четинвилерикай суьгьбет авунихъ галаз санал, ветеранди школьникриз хъсандиз кIелуниз эвер гана.
Школада 4-классдин аялар пионервилиз кьабулуниз талукьарнавай мярекатни кьиле фена. Анал аялри Ватандикай, Гъалибвиликай шиирар кIелна. Тебрикдин рахунрилай гуьгъуьниз 64 аял пионервилиз кьабулна.
Гъалибвилин сувариз талукьарна тухвай пионеррин сборни метлеблуди хьана. Анал Гъалибвилин юбилейдиз талукьарнавай доклад школадин старший пионервожатый Р. Малабаева авуна.
- Вини СтIалрин юкьван школадин 3-4-классра кIелзавай аялри Гъалибвилин 65 йисан юбилейдиз талукьарнавай чIехи концерт гана, - кхьизва чи штатадик квачир корреспондент Л. Исаевади. – Ам хуьруьнвийриз гзаф бегенмиш хьана.
Хуьре дяведа телеф хьайибуруз эцигнавай обелискдин патав аялар пионервилиз кьабулуниз талукьарнавай мярекатни кьиле фена.
Хуьрерин мухбиррин чарарай аквазвайвал, Гъалибвилин 65 йисан юбилейдиз талукьарнавай мярекатар ЦIийи Макьарал, КIварчагъа, Испика, Агъа СтIалдал, Шихидхуьре, Цмурдал ва маса хуьрерани кьиле фена.