Вахт са куьнизни муьтIуьгъ туш: ада анжах виликди еримишзава. Ингье, вишералди шегьерарни хуьрер харапIайриз элкъуьрай, миллионралди инсанар телеф авур, рикIера сагъ техжер хер тур, барбатIвилер, кашни-мекь гъайи Ватандин ЧIехи дяве куьтягь хьайидалай инихъ 65 йис алатнава. Амма къени гьа мусибатдин йикъар халкьдин рикIелай алатзавач.
Вахтар фирдавай, Гъалибвал къачуник пай кутур кьегьалрин кьадарни тIимил жезва. ИкI, дяведин йисара чи райондай фронтдиз 3930 кас фенай. Абурукай ватандиз хтун кьисмет хьайи 2198 касдикай къе амайди 15 кас я. Ихьтин кьве кьегьалдикай чна газетдин и чина куьрелди суьгьбетзава.
Ватандин ЧIехи дяведин ва зегьметдин ветеран Шайдаев Нажмудин Шайдаевич АгъастIалрин хуьре гьуьрмет авай агъсакъалрикай сад я. И гьуьрмет ада вичин хуш рафтарвилелди, баркаллу краралди, ширин мецелди къазанмишнавайди я.
Н. Шайдаев 1920-йисан 6-октябрдиз дидедиз хьана. 1939-йисуз Кьасумхуьруьн юкьван школада 10-класс акьалтIарай ада СтIал Сулейманан тIварунихъ галай колхозда кIвалахна.
1941-йисан 11-январдиз адаз армиядин жергейриз эвер гана. Ада Харьковдин военный округда младший лейтенантар гьазурдай куьруь вахтунин (ускоренный) курсар акьалтIарна, Дальновосточный военный округда 183-стрелковый дивизияда кьилдин учебный отделенидин командир яз къуллугъна.
Н. Шайдаевакай 1943-йисалай Приморский военный округдин 39-стрелковый учебный полкуна 6-стрелковый бригадада курсант, 1944-йисан 4-мартдилай Харьковский военный округда 242-запасной полкунин 8-стрелковый дивизияда отделенидин командир хьана.
1945-йисан сифте кьилера Н. Шайдаев 1-Украинадин фронтдин 102-стрелковый дивизиядин 40-стрелковый полкуна пулеметчикрин взводдин командир яз женгерик экечIна. Анра викIегь лезги хци вич женгинин кар хъсандиз чидай, дирибаш аскер, командир яз къалурна. Младший лейтенант Н. Шайдаева Польшадин, Чехословакиядин шегьерарни хуьрер фашистрикай азад хъувун патал кьиле фейи женгера жуьрэтлувилер къалурна.
Дяведилай гуьгъуьниз Н. Шайдаева са йисуз армиядин жергейра къуллугъ хъувуна.
Хурудал Ватандин ЧIехи дяведин 1-дережадин орден, са шумуд медаль алаз ватандиз хтай Нажмудин Шайдаевича яргъал йисара акьалтзавай несилдиз чирвилер ва тербия гунин рекье бегьерлувилелди зегьмет чIугуна.
Дяведин ва зегьметдин ветеран, чIехи ва гьуьрметлу хзандин кьил, хуьруьн агъсакъалрин Советдин член тир Нажмудин Шайдаевич Шайдаева хуьре жегьилрин арада несигьатчивилин еке кIвалахни тухузва.