Дагъустан Республикадин вири районра ва шегьерра хьиз, 9-апрелдиз чи райондани «Сад тир политюгъ» кьиле фена. Муниципальный райондин администрациядин заседанийрин залда райондин активдихъ галаз Дагъустан Республикадин Халкьдин Собранидин депутат Гьамидулагь Исмаилович Мегьамедов, Дагъустан Республикадин Халкьдин Собранидин депутат, законодательстводин рекьяй комитетдин председатель Сейфулагь Бейдулагьович Исакьов, Дагъустан Республикадин Халкьдин Собранидин депутат, «Справедливая Россия» фракциядин руководитель Камиль Мегьамедович Давдиев ва Дагъустан Республикадин Халкьдин Собранидин депутат Фикрет Газимегьамедович Ражабов гуьруьшмиш хьана.
И мярекат, республикадин парламентдай атанвай багьа мугьманар тебрик авуналди ва гьялзавай месэладикай лугьуналди, муниципальный райондин администрациядин Кьил Штибег Гьажимегьамедович Мегьамедханова ачухна ва кьиле тухвана. Ада къейд авурвал, депутатрин ихьтин чIехи десте чи райондиз эхиримжи йисара сифте яз атанва. Штибег Гьажимегьамедовича инанмишвал къалурайвал, Республикадин Президентвиле Мегьамедсалам Мегьамедалиевич Мегьамедов хкягъуник ва Республикадин Гьукуматдин, Халкьдин Собранидин кьилиз цIийи руководителар атунихъ галаз ихьтин гуьруьшмишвилер мукьвал-мукьвал жеда, абуру санлай Дагъларин уьлкведа хьиз, райондани общественно-политический гьалар хъсан хьуниз куьмек гуда.
И мярекатдал алай асул месэла ихьтинди тир: «Эхиримжи вахтара хьайи терроризмдин ва экстремизмдин чIуру вакъиаяр, гьакIни РФ-дин Президент Дмитрий Медведев Дагъустандиз атун веревирд авун».
И месэладай Сейфулагь Бейдулаевич Исакьова гегьенш доклад ва Гьамидулагь Исмаилович Мегьамедова алава доклад авуна.
Абуру къейд авурвал, эхиримжи йисара гьам Россияда, гьам Дагъустан Республикада общество тупламишунин, вири терефрин диалог гегьеншарунин, экономика цIийи хъувунин, инсанри пайгар ва ерилу уьмуьр кечирмишунин рекьерай виликди камар къачузва. ИкI хьун алай вахтунда авай къайда чIуруз ва пайгардакай хкудиз алахъзавай террористрин интересрихъ галаз кьазвач.
29-мартдиз Москвадин метрода ва 31-мартдиз Къизляр шегьерда терактар тухуни и кардин гьакъиндай ачухдиз шагьидвал ийизва. Гьа и вакъиайрихъ галаз алакъалу яз Дагъустандиз РФ-дин Президент Дмитрий Медведев атана, ада Махачкъалада Кеферпатан Кавказдин федеральный округдин республикайрин, хатасузвилин Федеральный къуллугъдин территориальный подразделенийрин ва къенепатан крарин органрин руководителрихъ галаз совещание тухвана.
Докладчийри къейд авурвал, терроризмдихъ галаз женг чIугунин месэлайриз талукь совещанидал Дмитрий Медведева терроризмдихъ галаз женг чIугунин асул вад везифа тайинарна, къанун-къайда хуьдай органар, судар мягькемарун, террористриз ягъунар кьун, бандитрин тешкилатрикай хкечIун кьетIнавай гражданриз куьмек гун, социальный, экономикадин хел вилик тухун, ахлакьдинни руьгьдин ерияр мягькемарун чарасуз тирдан гьакъиндай малумарна.
Гьялзавай месэладай анал чпин фикирар депутатар тир Камиль Мегьамедович Давдиева ва Фикрет Газимегьамедович Ражабовани лагьана.
Чпин рахунрин эхирдай депутатри агьалийри ягъалмишвилериз рехъ тагун, сабурлувал, уяхвал хуьн лазим тирди къейдна.
ДР-дин Халкьдин Собранидин депутатри терроризмдихъ ва экстремизмдихъ галаз алакъалу яз и мярекатдин иштиракчийрин патай хьайи суалризни жавабар гана.
Къейд авун лазим я хьи, асул месэла гьялунихъ галаз санал, и гуьруьшдал район социально-экономический рекьерай вилик тухунихъ, агьалийрин яшайишдинни дуланажагъдин шартIар хъсанарунихъ галаз алакъалу хейлин маса месэлаярни къарагъарна, веревирд авуна.
Эхирдай Штибег Гьажимегьамедович Мегьамедханова мугьман хьунай, метлеблу месэлайрай рахунар авунай ДР-дин Халкьдин Собранидин депутатриз мад сеферда чухсагъул малумарна.
Депутатар и юкъуз хуьруьн майишатдин карханайра, школайра, цIийиз эцигзавай объектрални хьана.