Малум тирвал, чи уьлкведин маса чкайра хьиз, Дагъустандани милли чIалар хуьниз ва вилик тухуниз къвердавай артух фикир гузва. Им тIебии карни я. Вучиз лагьайтIа, алай вахтунда дуьньядал алай гъвечIи халкьар, сад-садан гуьгъуьналлаз терг жезва, яни тарихдин сиягьдай акъатзава. Абур ихьтин кьисметдал атунин себебни сифтени-сифте чпин чIалакай магьрум хьун я. Вичин дидед чIал амачирди ам халкь туш, ам чкIида. И месэла гзаф миллетринди тир Дагъустандани хцидаказ вилик акъвазнавай месэлайрикай сад хьуниз килигна, ина гьар са миллетдин чIал, кьетIенвилер хуьн патал жуьреба-жуьре серенжемар кьабулзава. И жигьетдай яз чи Республикада гьар йисуз тухузвай «Йисан хайи чIалан лап хъсан муаллим» конкурс ва хайи чIаларай тухузвай кIелзавай аялрин олимпиадаяр къалуриз жеда.
ИкI, и мукьвара Кьасумхуьруьн 1-нумрадин умуми образованидин юкьван школадин базадин бинедаллаз райондин школайрин муаллимрикай «2010-йисан дидедин чIалан лап хъсан муаллим» хкягъун патал райондин конкурс кьиле фена. Ана райондин гьар школайрай 9 муаллимди иштиракна. А конкурсдин райондин этап кьиле тухунин жавабдарвал РУО-дин информациядинни методический центрдин методист Мегьамедова Назират Мегьамедовнадин хиве тунвай. Виликамаз тешкиллувилин комитет хкяна ва жюридин состав тестикьарна.
Конкурс кьиле физвай гьалдал гуьзчивал тухун РУО-дин начальникдин заместитель Къ. А. Аминовал тапшурмишнавай.
Райондин конкурсда 1-чка Курхуьруьн 1-нумрадин СОШ-дин лезги чIаланни литературадин тарсар гузвай муаллим Г. А. Межидовади, 2-чка ЦIийи поселокдин СОШ-дин муаллим З. С. Султанагьмедовади ва 3-чкани Асалдхуьруьн основной школадин муаллим М. Гь. Баламетова кьуна. И конкурсда 1-чка кьур Г. А. Межидовади республикадин конкусрда иштиракна.
Идахъ галаз сад хьиз, хайи чIалай райондин аялрин олимпиадада гъалибвал къазанмишай (9, 10 ва 11-классрин) пуд аялди 29-мартдиз Махачкъалада кьиле фейи республикадин олимпиадада иштиракна ва чпихъ дидедин чIалай хъсан чирвилер авайди къалурна. ИкI, 10-классрин аялрин арада Кьасумхуьруьн 1-нумрадин СОШ-дин ученица И. М. Бабахановади 1-чка (муаллим Ф. А. Саидова ), 9-классрин аялрин арада Эминхуьруьн СОШ-дин ученица Г. А. Алиевади (муаллим Ж. Гь. Жигерова) ва 11-классрин аялрин арадани Герейхановский 1-нумрадин СОШ-дин ученица Л. Ф. Исрафиловади (муаллим С. Р. Османова) 3-призовой чкаяр кьуна. Абуруз талукь тир дережайрин дипломар гана.
30-мартдиз Махачкъалада хайи чIалан литературадайни чIехи классрин аялрин олимпиададин республиканский этап кьиле фена.
Ана чи райондай 3 аялди иштиракнавай. 11-классдин аялрин арада Герейхановский 1-нумрадин СОШ-дин ученица Э. Ф. Аслановади (муаллим С. Р. Османова) ва 9-классрин аялрин арадани АгъастIалкъазмайрин СОШ-дин ученица З. Ж. Мегьамедовади (муаллим В. З. Аскеров) 3-призовой чкаяр кьуна.
Чна винидихъ тIварар кьунвай аялриз ва абурун муаллимриз гъалибвал мубаракзава, абурухъ кIвалахда ва кIелунра мадни еке агалкьунар хьана кIанзава.