Адет яз, гьар са йис акъатайла организацийри, карханайри нетижаяр кьада, авур кIвалахар веревирд ийида, къазанмишай агалкьунрик чпин пай кутур пешекарар тайинарда. ИкI, райондин къенепатан крарин отделди алатай йисан кIвалахдин нетижайриз килигна милициядин старший лейтенант, Кьасумхуьруьн участокдин участковый инспектор Гьасанов Мурад Селимович РОВД-дин лап хъсан участковый яз гьисабна. Гьелбетда, им милициядин къуллугъчи вичин хиве авай везифайрив жавабдарвал гьисс авуналди эгечIунин, къанун-къайда, инсанрин саламатвал хуьнин рекьерай еке кIвалах тухунин, са гафуналди, дурумлу зегьметдин нетижа я.
М. Гьасанов 1969-йисуз Мегьарамдхуьруьн райондин Советский хуьре дидедиз хьана. Ада хуьруьн юкьван школа, 1987-йисуз Харьковдин агропромышленный университет акьалтIарна, 11 йисуз С. Стальский РОВД-да ППС-дин милиционер яз кIвалахна. 2004-йисалай инихъ, чна винидихъ лагьайвал, Кьасумхуьруьн участокда РОВД-дин участковый инспектор яз кIвалахзава. Гьелбетда, 15 агъзурдалай виниз агьалияр яшамиш жезвай, техникадин такьатрин кьадар артух, райцентр вич чIехи хьанвай алай девирда и везифаяр тамамарун регьят кар туш. Гьар са чкада участковый инспектордин къайгъуяр ва везифаяр къалин я. Райондин центр хьтин чIехи чкада абурун кьадар мадни артух жезва.
М. Гьасанова къайда-къанун, инсанрин саламатвал хуьнин, тахсиркарвилерин, чIуру кIвалахрин вилик пад кьун патал халкьдин арада профилактикадин еке кIвалах тухузва. Четин хзанрихъ, виликдай суд-дуванрик акатай, чIуру крарал машгъул тир инсанрихъ галаз М. Гьасанова иллаки еке кIвалах тухузва, абур обществодиз, халкьдиз вафалу инсанар хьун патал чалишмишвал ийизва. Участковый инспектордин гьакъисагъ, гъавурда аваз ва законрихъ галаз кьадайвал тухузвай кIвалахди вичин хъсан нетижани гузва. И кар себеб яз, Мурад Селимович, чна винидихъ лагьайвал, лап хъсан участковый яз гьисабни авунва.