Курхуьруьн 1-нумрадин М. Рагьимован тIварунихъ галай юкьван школадин къаншарда адан кьулухъ галай багъда спортзал эцигун патал бес кьадар чил чара авуна. Гуьгъуьналлаз проектдинни сметадин документрин къайгъуйра хьана ва абур геж тавуна гьазурна. И йикъара муаллимар, чIехи классрин аяларни кIватI хьана, субботник тешкилуналди, спортзалдин хандакIар яна, анал вацIун къванер, къум хкана.
ХандакIар ягъунин карда школьникар тир К. Шагьпазова, Ф. Абдурагьманова, М. Агъамирзоева, А. Шихрагьимова, Т. Аликъулиева, муаллимрикай М. Эскерова, Р. Гьажалиева, В. Межидова, М. Османова, администрациядин работник А. Рамазанова ва масабуру хъсандиз зегьмет чIугуна.
Абуру са куьруь вахтунда яргъивал 24, гьяркьуьвал 12 метр алай дараматдин хандакIар яна. Эцигунрин кIвалахар Дербентдай къведай махсус бригадади кьиле тухуда.
Къейдна кIанда хьи, хуьре спортзал эцигзавайдакай хабар хьайи хуьруьнвийриз тежер кьван шад хьана. Абуру райондин руководстводиз, хуьруьн администрациядиз, кьилди къачуртIа и кар гъиле кьунвай Гьажалиев Радиказ чухсагъул лугьузва, абур чпелай алакьдай гьар жуьредин куьмекарни гуз гьазур я. Шак алач, белки пулунин куьмекар гудай спонсорарни майдандиз экъечIин!